काठमाडौं । सशस्त्र प्रहरी बलको महिला शाखा र एनसेलको सहकार्यमा जोन्टा क्लब काठमाडौंले लैङ्गिक हिंसाविरुद्ध सचेतना कार्यक्रम सम्पन्न गरेको छ । लैङ्गिक हिसांविरुद्धको १६ दिने कार्यक्रमअन्तर्गत महिला हिंसाविरुद्ध सचेतना कार्यक्रम आयोजना गरिएको हो । बाल–विवाह, घरेलु हिंसा, कार्यस्थलमा हुने हिंसा र सार्वजनिक स्थलमा हुने हिंसाविरुद्ध आवाज उठाउनुपर्ने कुरामा जोन्टा क्लब अफ काठमाडौंले विशेष जोड दिँदै आएको छ ।

उक्त कार्यक्रममा महिलाले भोगिरहेका विभिन्न समस्यालाई प्रस्तुत गरिएको थियो । नेपालमा महिलासम्बन्धी कानुनी अधिकारका विषयमा छलफलसमेत भएको थियो ।जोन्टाको १६ दिने अभियानअन्तर्गत काठमाडौंको १३ स्थानमा रहेका क्यूएफएक्स सिनेमाघको ३१ स्क्रिम, यातायातमा बाल विवाह, घरेलु हिंसा, कार्यालयमा हुने दुर्व्यहार र यौन दुर्व्यहार सम्बन्धी चार फरक भिडियो प्रदर्शन गरिएको छ ।

कार्यक्रमको प्रमुख अतिथि एआईजी डा.चन्द्रप्रकाश गौतम थिए । कार्यक्रममा काठमाडौं महानगरभित्रका महिला, एपीएफ महिला र जोन्टा क्लबका सदस्यहरू सहभागी थिए । सन् २०१२ मा काठमाडौंमा जोन्टा इन्टरनेशनलको भातृ संगठनको रुपमा स्थापना भएको जोन्टा क्लब अफ काठमाडौंले सेवा र वकालत मार्फत स्थानीय र राष्ट्रिय स्तरमा युवा र महिलाविरुद्ध हिंसा अन्त्य गर्नको लागि उनीहरुको आर्थिक, शैक्षिक र अन्य सम्बन्धित मुद्दाहरूमा काम गरिरहेको छ ।