काठमाडौं । साहित्यकार तथा गीतकार सरला श्रेष्ठद्वारा रचित ‘ए मेरो मनको राजा’ गीत सार्वजनिक गरिएको छ । मंगलबार काठमाडौंमा गीतकार संघ नेपालद्वारा आयोजित कार्यक्रमकाबीच ‘ए मेरो मनको राजा’ गीतको सार्वजनिक गरिएको हो । यसै अवसरमा शारदा मासिक ९विशेषाङ्क सरला श्रेष्ठका गीतहरु० पनि लोकार्पण गरियो ।

कार्यक्रममा वरिष्ठ कलाकार मदनकृष्ण श्रेष्ठले गीत सार्वजनिक भएकोमा शुभकामना दिँदै आफू पनि लेखनमा रुचि राख्ने व्यक्ति भएको बताए । गीतकार संघ नेपालका अध्यक्ष बसन्त बित्यासी थापाले गीत सङ्गीतको क्षेत्रलाई लगानीको पनि सुनिश्चितता गर्ने गरी काम अगाडि बढाएको बताए । उनले भने, ‘लगानी पनि सुनिश्चित गर्नुपर्छ भनेर हामी उद्यमीहरु संस्थागत हिसाबले उद्योगको रुपमा स्थापित हुनुपर्छ भनेर गीत सङ्गीतको क्षेत्रलाई अगाडि बढाइरहेका छौं ।’

करिव साढे तीन दशकदेखि नेपाली साहित्यको क्षेत्रमा अनवरत रुपमा सक्रिय रहँदै आएकी एक साहित्यकार, गीतकार तथा सर्जक हुन् सरला श्रेष्ठ । लामो समयदेखि अमेरिकामा रहेर स्वास्थ्यकर्मीको रुपमा कार्यरत रहे पनि गीतकार श्रेष्ठले २०४५ सालभन्दा अघिदेखि साहित्य–सिर्जनाको क्षेत्रमा चलाउन थालेको कलम आज पनि निरन्तर अघि बढिरहेको छ । यसपटक केही महिनाका लागि स्वदेश आएको मौका पारेर साहित्यकार श्रेष्ठद्वारा केही ऐतिहासिक कार्यहरु भएको छ ।